सारा संसार लगाए ताला, गरिबले के खाला..?

लकडाउनले गर्दा पर्यटक आउने ठाउँ ठमेल सुनसान छ । पर्यटकले भरिभराउ हुने ठमेलका गल्लीहरू खाली छन् । क्युरियो पसल, रेस्टुरेन्ट, पब, डान्स क्लब, दोहोरी सबै बन्द छन् । मान्छे नै नभएपछि के खुल्थे त !

तैपनि म कोही मान्छे भेटिहाल्छ कि भनेर ठमेल नरसिङ चोकमा सारङ्गी बोकेर बसिरहेको छु । म डम्बर गन्धर्व । गाइने मेरो पेसा हो । म पर्यटकलाई सारङ्गीको धुन सुनाएर नै परिवार पाल्थेँ तर  कोरोनापछि भने पर्यटक आउन बन्द भयो ।

म २०२८ सालमा गोरखाबाट काठमाडौँ आएको हुँ । तर यतिका वर्षमा यस्तो पीडा कहिल्यै भोग्नु परेको थिएन । जीवनमा अहिले जति सास्ती कहिल्यै सहनु परेको थिएन । मैले भूकम्प र नाकाबन्दी दुवै भोगेँ । भूकम्प र नाकाबन्दीको समयमा पनि ठमेलमा पर्यटक हुन्थे । आना, सुका आम्दानी हुन्थ्यो, गुजारा चल्थ्यो ।

मैले सारङ्गी रेटेपछि मात्र मेरो घरमा चुल्हो बल्छ । गल्कोपाखामा ५ जनाको परिवार छ मेरो । ५९ वर्ष पुगे म । लकडाउन भएपछि घरमा खाद्यान्न सकिएको छ । घरमै बसेर खान मिल्दैन भनेरै म पुलिसको लाठी सहेर पनि सडकमा आएको हुँ ।

सारङ्गी सुन्ने कोही भेटियो भने पैसा दिन्छन् कि भनेर आएको तर सडकमा त चरो मुसो कोही छैन । लकडाउनको तेस्रो सातादेखि नै मेरो कोठामा खाद्यान्न सकियो । त्यसयता म ‘कोही भेटिन्छ कि’ भन्ने आसमा दिनहुँ ठमेल आउँछु ।

मनमा कहिलेकाहीँ कसैको घरमा गएर सारङ्गी रेटौँ भन्ने पनि लाग्छ तर अहिले सबैको घरका ढोकागेट बन्द नै छन् ।

यसरी सधैँ सारङ्गी बोकेर निस्किए पनि आम्दानी नभए पनि खाना बाँडिरहेको ठाउँबाट खाना लिएर जान्छु । कति ठाउँमा त खाना घर लग्न दिन्छन्, कति ठाउँमा लान पाइँदैन । यसरी आफू खाएर घरमा खाना लग्न नपाउँदा साह्रै चित्त दुख्छ । घर जाँदा, अलिकता चामल लिएर गए बुढी पनि खुसी हुन्थी कि भन्ने लाग्छ ।

बाहिर निस्क्यो मान्छेको सम्पर्कमा आयो भने कोरोना सङ्क्रमण हुनसक्छ भन्ने त थाह छ तर ज्ञानले भोक मेट्दैन ! डर त कोलाई छैन र ? ज्यानको माया कोलाई छैन र ? ज्यानभन्दा ठुलो भोक भएपछि कसको के लाग्छ र ? त्यसैले, सारङ्गीमा आफ्नै विरहको गीत गाउँछु बस्छु… ‘सारा संसार लगाए ताला, काम छैन, गरिबले के खाला ?’

यो कथा डम्बर गन्धर्वसंग गरिएको कुराकानीमा आधारित भएर लेखिएको हो ।

 

यो अन्योल कहिलेसम्म..?

शान्तिपूर्ण प्रदर्शन

लकडाउनले आतङ्क मात्रै मच्चायो

Leave a reply:

Your email address will not be published.

Site Footer

Sliding Sidebar

“तन्नेरी चासो” युवाहरुले समाज वा देशका बारेमा आफूलाई लागेका वा देखेका कुराहरु विश्लेषण गर्दै आफ्नो विचार अभिव्यक्त गर्ने साझा मञ्च हो । यसको प्रमुख उद्देश्य राजनीतिक तथा सार्वजनिक निकायहरूको निगरानी, सामाजिक तथा राजनीतिक विषयहरुमा तार्किक बहस र युवासँग प्रत्यक्ष सरोकार राख्ने नीतिगत सवालहरूमा विश्लेषण तथा छलफल गर्ने रहिआएको छ ।